ايه اللي بيحصل في سوق الدهب؟ وليه الأسعار بترتفع بشكل ملحوظ؟ وهل دلوقتي وقت مناسب للشراء ولا الأفضل نستنى شوية؟ أسئلة كتير بتدور في دماغ كل واحد بيفكر يحافظ على فلوسه خصوصًا بعد ما الدهب بقى حصان السباق في السوق المصري خلال آخر كام أسبوع.
خلال الشهر اللي فات.. الدهب في مصر ماكانش ساكن ولا هادي ولا حتى بياخد هدنة.. ولكن كان في موجة صعود حقيقية واضحة وملموسة.
عيار 21 لوحده طلع بنسبة 3.31% في أسبوع واحد بس وقفَل عند 5625 جنيه بعد ما كان 5445 جنيه في بداية الأسبوع كمان لمس أعلى مستوى ليه في أسبوعين عند 5630 جنيه للجرام.
طب ليه الطفرة دي حصلت؟
بكل بساطة.. السوق المحلي تأثر بحاجة من اتنين حركة الأونصة عالميًا وصدى خفيف في سعر الدولار قدام الجنيه.. الأونصة رجعت تتحرك لفوق بقوة وقربت من أعلى مستوى ليها في أسبوعين وده لوحده كافي إنه يشعل السوق هنا ده غير إن سعر الصرف اتحرك تحرك بسيط، لكن واضح إنه كافي عشان يزق الأسعار لفوق بشكل أسرع.
وخلال شهر نوفمبر بس.. الدهب المحلي كسب 270 جنيه للجرام.. زيادة 5.2% كاملة ولما تشوف إن الدولار كان شبه ثابت أغلب الوقت.. تعرف إن سبب القفزة الحقيقي كان الأونصة اللي اتخطت 4150 دولار، وبعدين كسرت حاجز 4200 دولار وقفلت فوقه.. الأهم إن ارتفاع الأونصة مش صدفة.. ده بسبب إن العالم كله مستني خطوة الفيدرالي. التوقعات بإن الفيدرالي الأمريكي يخفض الفايدة وصلت لـ 88% وده معناه حاجة واحدة الدهب هيلاقِي ضهر يسنده.
طيب.. وبالنسبة للمشهد العالمي؟
الصورة أوضح من أي وقت.. سعر الأونصة دلوقتي بيستهدف الـ 4245 دولار ولو كسر الرقم ده.. الحركة الجاية هتبقى حوالين 4300 دولار.. ولو السيناريو ده حصل ومع استمرار الضغط على سعر الصرف عندنا.. عيار 21 هيبقى قدامه فرصة إنه يخترق 5700 جنيه الكلام ده مش تهويل.. ده تحليل مبني على اللي حصل بالفعل الأسبوع اللي فات.
ولو بصينا للسوق المحلي هنلاقي إنه مش بس متأثر.. ده حساس جدًا لأي تغيير ولو بسيط في السعر العالمي.. وده اللي خلى عيار 21 يكسر مستويات مهمة زي 5550 وبعدين 5600 جنيه.. والمستويات دي لما بتتكسر.. بتفتح الطريق لمستويات أعلى بسهولة أكبر.
نيجي بقى للسؤال اللي بيشغل الكل.. هل الوقت مناسب للشراء؟
الإجابة هنا مش واحدة للكل.. لو انت بتشتري للادخار الطويل.. الذهب دايمًا بيكسب والمستويات الحالية لسه أقل من اللي ممكن نشوفه لو السيناريو العالمي استمر.. أما لو بتدور على مضاربة قصيرة المدى.. لازم تفكر مرتين لأن السوق داخل على قرار فيدرالي مهم وأي مفاجأة – نزول أو طلوع – هتأثر على الأسعار فورًا.
الأيام الجاية مش هتكون هادية.. سواء للأعلى أو للأسفل الحركة جاية جاية المهم إنك تكون فاهم الصورة ومتحكم في قرارك.
الدهب دلوقتي مش مجرد معدن.. ده مؤشر على توتر الأسواق، ومقياس لحركة الدولار، وملاز آمن للعالم كله..ولو فضلت التوقعات على ما هي عليه.. الموجة الصاعدة لسه قدامها مساحة تمشي فيها.
التعليقات