يا ترى ليه أول ما الفيدرالي الأمريكي أعلن خفض الفايدة في آخر اجتماعات 2025 كل الأسواق اتحركت مرة واحدة؟ وازاي قرار في واشنطن يقدر يغيّر أسعار الدهب والدولار في كل بلاد العالم ؟ وهل إحنا رايحين لسنة فيها هدوء اقتصادي ولا موجة تقلبات ممكن تهز أسواق العالم كله؟ وإيه شكل الشهور الجاية على الجنيه المصري وعلى الدهب اللي بقى الملاذ الآمن الأول عند الناس؟
أسئلة كتير ومتشابكة وكلها محتاجة تفصيص وقراءة هادية عشان نفهم إحنا داخلين على إيه بالظبط.
خلّينا نبدأ من نقطة الأساس الفيدرالي الأميركي أخيرًا حسم وقرر يخفض الفايدة بعد أطول دورة تشديد نقدي شافها العالم خلال السنين الأخيرة قرار الخفض مش مجرد خطوة فنية لكنه رسالة واضحة إن التضخم هناك اتراجع وإن الاقتصاد محتاج دفعة جديدة للنمو.
أول ما القرار نزل، الدولار عالميًا بدأ يفقد جزء من قوته وده امر طبيعي جدًا.. لأن أي خفض للفايدة بيقلل جاذبية العملة وبيخلّي المستثمرين يدوروا على بدائل تحقق عائد أعلى.
طب ايه أول سوق بيتأثر؟
أول سوق اتأثر بقرار الفيدرالي هو سوق الدهب ومع خبر خفض الفايدة الدهب رجع يلمع تاني.
المستثمر اللي كان مركزعلى الدولار باستفادة من عوائد السندات الأميركية دلوقتي هيدوّر على مخزن قيمة يحافظ على فلوسه خصوصًا مع توقعات إن الفيدرالي مكمل في دورة الخفض السنة الجاية.
وده معناه إن أسعار الدهب عالميًا عندها قابلية للصعود ويمكن نشوف مستويات قياسية جديدة لو الفايدة اتخفضت أكتر أو حصل أي توترات سياسية أو اقتصادية في 2026.
طيب ده ينعكس إزاي على مصر؟
في العادة.. أول ما الدهب بيغلى عالميًا، سوق الدهب المحلي بيتحرك فورًا.. ومع انخفاض قيمة الدولار عالميًا ومع بداية موجة تفاؤل في الأسواق التجار والمستوردين ممكن يلاقوا مساحة أكبر في التسعير.
بس ده مش معناه إن الأسعار عندنا هتنزل بشكل حاد.. لأن سعر الدهب في مصر دايمًا بيتحرك بمزيج من السعر العالمي وسعر الدولار المحلي وحجم الطلب الداخلي.. ولو زاد الطلب مع الأخبار دي الأسعار هتفضل مرتفعة حتى لو الدولار اتراجع عالميًا.
نرجع للدولار.. القرار ده عنده تأثير مزدوج على سوق الصرف في مصر أول تأثير هو إن الدولار عالميًا بيضعف وده ممكن يعمل راحة بسيطة في ضغوط الاستيراد.
التأثير التاني إن المستثمرين الأجانب اللي كانوا مركزين على أدوات الدين الأميركية ممكن يدوروا على أسواق ناشئة تقدم عوائد أعلى.. ومصر واحدة من الدول اللي ممكن تستفيد من الحركة دي لو الظروف الداخلية مستقرة وده ممكن يدعم تدفقات نقدية جديدة ويحسّن وضع السيولة الدولارية.
لكن هل ده معناه إن الدولار عندنا هينزل تلقائيًا؟
لأ.. الموضوع أعقد من كده.. الدولار في مصر مرتبط بعوامل محلية أكتر من ارتباطه بالفيدرالي زي حجم المعروض.. مستوى الطلب.. التزامات الاستيراد.. التدفقات الاستثمارية.. وإيرادات قناة السويس والسياحة والغاز.
لكن اللي نقدر نقوله بثقة إن ضعف الدولار عالميًا بيقلل جزء من الضغوط ويخلق فرصة لتحسن أكتر في سوق الصرف لو السيولة استمرت تتحسن بالشكل اللي شفناه في الشهور الأخيرة.
أما الأسواق المالية فده وقت حساس جدًا.. عادةً خفض الفايدة عالميًا بيشجع المستثمرين على المخاطرة أكتر وده معناه إن البورصات في طريقها لموجة نشاط.. خصوصًا في الدول اللي عندها إصلاحات مالية ونقدية ماشية في الاتجاه الصح ومصر واحدة من الدول اللي ممكن تستفيد من ده خاصة لو استمرت خطوات ضبط المالية العامة وخفض الدين وزيادة الاستثمارات الأجنبية المباشرة.
الأكيد إن قرار الفيدرالي الأميركي بخفض الفايدة نقطة تغيّر في اتجاهات الأسواق.. الدهب عنده قابلية للصعود.. الدولار العالمي في طريقه لفقدان جزء من قوته.. الأسواق الناشئة عندها فرصة لجذب سيولة جديدة.. وسوق الصرف في مصر قدامه شهور مهمة هيبين فيها إذا كانت التحسينات الحالية هتكمل ولا لأ.
التعليقات