في وقت مصر بتسابق الزمن علشان تزود إنتاج أهم محصول استراتيجي في البلد اللي هو القمح، ظهر نظام الزراعة على المصاطب كحل ذكي وعملي يحقق إنتاج أعلى ويقلل استهلاك المية والتقاوي.
ومع بداية موسم زراعة 3.5 مليون فدان قمح، الدولة بدأت تتحرك بخطوات سريعة وملموسة علشان تعمّم “قمح المصاطب” على أكبر مساحة ممكنة، خطوة شكلها زراعي لكن تأثيرها اقتصادي وأمني وغذائي كبير جدًا.
مع بداية موسم زراعة القمح، مصر قدام مرحلة جديدة من التطوير الزراعي، مرحلة هدفها الأساسي إنها تزود إنتاج الفدان من غير ما تزود التكلفة ولا استهلاك المية، وده بالظبط اللي بتعمله دلوقتي من خلال التوسع في زراعة قمح المصاطب، التقنية اللي أثبتت بالفعل إنها بتطلع إنتاج أعلى بنسبة كبيرة جدًا مقارنة بالطريقة التقليدية.
بس خلينا نشرح ببساطة: الزراعة على المصاطب معناها إن الأرض بتتجهز بشكل يخلي القمح يتزرع في خطوط مرتفعة ومنظمة، الخطوة دي بتخلي المية توصل للنبات بشكل أدق، والبذور تتوزع صح، والجذور تستفيد أحسن.. والنتيجة؟ إنتاج أكتر وتكلفة أقل.
والسنة دي المحافظات بدأت زراعة القمح على مساحة توصل لـ 3.5 مليون فدان، وفي نفس الوقت الدولة وزعت 75 سطارة زراعية مطورة، ودي معدات حديثة بتساعد المزارعين إنهم يطبقوا طريقة “المصاطب” بالشكل المظبوط، توزيع المعدات ده اتعمل في محطات الزراعة الآلية الكبيرة في المحافظات، وكل ده استعداد لموسم يعتبر من أهم المواسم الزراعية في مصر.
الفكرة مش بس تطوير معدات الفكرة إنك تغير تفكير مزارع كامل وتعلمه طريقة جديدة توفر عليه مية وبذور، وتديله إنتاج أكتر من نفس الأرض اللي هي أصلاً ثابتة ومش بتزيد.
وده اللي بتسعى له الدولة دلوقتي: إن كل فدان في مصر يشتغل بكامل طاقته، خصوصًا في محصول استراتيجي زي القمح.. بس تفتكروا ليه قمح المصاطب فارق كده؟
هقولك .. عشان بيوفر مية ودي أهم نقطة، الري على المصاطب بيخلي المية تتوزع بدقة، وده يقلل الهدر بنسبة كبيرة جدا. كمان بيوفر تقاوي، بدل ما المزارع يرمي بذور كتير في الأرض، المصاطب بتخلي التوزيع منتظم، وده يقلل كمية التقاوي ويزود الإنبات.
والنبات نفسه بيطلع أقوى، التربة بتتنفس أحسن، والري بيبقى مضبوط، فالنبات ينمو بطريقة متوازنة وده بيقلل سقوط السنابل اللي كان بيخسر المزارعين زمان.
اخر حاجة بقى الإنتاجية بتزيد، وبتزيد كويس كمان.. المعادلات بتقول إن الفدان ممكن يطلع 3 لـ 5 أرادب زيادة مقارنة بالزراعة التقليدية وده رقم ضخم لما تجمعه على ملايين الأفدنة.. غير كده، طريقة المصاطب بتسهل مكافحة الحشائش، وبتخلي مرور العمال في الأرض أسهل، وده يقلل وقت الشغل وتكلفته.
الدولة كمان بتشتغل دلوقتي على تطوير محطات الزراعة الآلية وتزويدها بمعدات حديثة تساعد الفلاحين على تطبيق النظام الجديد بسهولة، والهدف النهائي إن كل مزارع في مصر يلاقي المعدات والخدمة جاهزة لحد عنده علشان مفيش حد يقول معرفتش.. وعشان كده الزراعة على المصاطب مش مجرد طريقة مختلفة هي اتجاه جديد مصر داخلاه بكل قوة.
اتجاه هدفه الأساسي تعظيم إنتاج القمح، المحصول اللي مفيش بيت مصري يقدر يستغنى عنه.. وكل خطوة في المشروع ده بتقول إن موسم القمح اللي جاي هيكون أقوى وأغزر وأوفر.
التعليقات