موسم الزراعة الشتوي في مصر دخل مرحلة الذروة، والمحصول الأهم هو القمح!
حوالي 3.5 مليون فدان هتتزرع بالقمح، بمشاركة كبيرة من الفلاحين والمزارعين، وفق خطة الدولة لتعزيز الإنتاج المحلي
والسر هو اتباع استراتيجية “الخماسية الذهبية” اللي هتضمن أعلى إنتاجية وجودة للمحاصيل.
دلوقتي مع بداية شهر هاتور في التقويم القبطي، الفلاحين بيبدأوا الموسم الشتوي بكل طاقتهم، لأن الجو بقى مناسب جدًا للزراعة واللي بيشتغلوا في الأرض بيحسوا بالفرحة لأن درجة الحرارة أقل والندى ورطوبة الصبح ساعدوا النباتات على النمو.
الفلاحين زمان كانوا بيسموا هاتور “شهر الرزق والبركة والذهب المنثور”، وده معناه إن الفترة دي خصبة جدًا، القمح والفول والمحاصيل الطبية والعطرية والخضر كلها محتاجة تتزرع دلوقتي عشان تحقق أعلى إنتاجية.
والنجاح في الموسم ده بيعتمد على الخماسية الذهبية، ودي عبارة عن خمس حاجات مهمة: اختيار أصناف مناسبة للأرض والجو، الزراعة على مصاطب عشان النبات يطلع كويس والجذور تتقوى، توقيت الزرع المناسب، الخدمة الجيدة للأرض زي السماد والتحكم في الآفات، وأخيرًا الري المحسوب عشان النبات ياخد الميه بالظبط اللي يحتاجه.
وخليني اقولك ان الفول البلدي الوقت مناسب جدًا لزراعته في المناطق الشمالية مع الحذر من الأمراض والآفات، وفي الأراضي المصابة الأفضل تأجيل الزرع لمنتصف الشهر، و النباتات الطبية زي الكمون واليانسون والكراوية محتاجة كبريت أثناء تجهيز الأرض عشان الزيت يكون نقي وجودته عالية.
اما محاصيل الخضر والفاكهة كمان محتاجة متابعة، يعني الجزر والبطاطس والبسلة محتاجين فسفور وبوتاسيوم عشان يكبروا كويس، والفراولة والطماطم والخيار والفلفل والباذنجان لازم نحميهم من الأمراض والفطريات ونخفف السماد الأزوتي وقت التزهير عشان ما يحصلش ضرر من الرطوبة.
والأشجار المثمرة زي المانجو والزيتون والموالح محتاجة الخدمة الشتوية والتقليم عشان المحصول يكون أفضل السنة الجاية، وخصوصًا الزيتون اللي الخدمة دي مهمة جدًا له، أما محاصيل القصب والبنجر فالفترة دي مهمة جدًا لتخزين السكر داخل النبات والبوتاسيوم هنا له دور كبير عشان الإنتاجية تبقى عالية.
يعني باختصار الموسم الشتوي ده مليان فرص، واستراتيجية الخماسية الذهبية هتخلي المزارعين يحققوا أعلى إنتاجية وجودة، خاصة في القمح اللي هو العمود الفقري للأمن الغذائي في مصر، والحقول السنة دي هتكون مليانة بالذهب المنثور، والدولة هتحقق قفزة كبيرة في الإنتاج الزراعي.
التعليقات