يا ترى ليه البنك المركزي مهتم اوي بالتطبيقات المالية الجديدة؟ وإزاي تطبيق مالي على الموبايل ممكن يغير شكل التعاملات في مصر كلها؟ وليه البنك المركزي مركز أوي على إنستا باي وهوية تحديدًا؟ وإيه علاقة ده بالتحول الرقمي اللي الدولة كلها ماشية فيه دلوقتي؟
اللي بيحصل دلوقتي مش مجرد تطبيقات جديدة نزلت على الموبايل.. لكن تغيير جذري في الطريقة اللي بنتعامل بيها مع الفلوس.. والبنك المركزي شايف إن التطبيقات دي هي المفتاح لثورة مالية حقيقية في مصر.
طب ليه البنك المركزي مهتم بالتطبيقات دي؟
الأسباب كتير أولها التحول الرقمي والتعامل اللاتلامسي.. الدولة عندها رؤية واضحة إنها تقلل استخدام الكاش وتسهّل المعاملات.. بدل ما تروح وتدفع نقدي، تقدر تحوّل أو تدفع بكبسة زر من الموبايل.. ده بيخلي العملية أسرع أنضف وكمان آمن أكتر.
كمان التطبيقات دي بتفتح الباب للناس اللي ماعندهاش حسابات في البنوك إنها تدخل النظام المالي بسهولة.. من خلال إنستا باي أو هوية، أي حد يقدر يدير فلوسه من غير ما يروح فرع بنك.
ولما المعاملات كلها تبقى رقمية البنوك بتقلل الورق والفروع والتكاليف الإدارية.. وفي نفس الوقت البنك المركزي يقدر يراقب حركة الأموال بشكل لحظي ويكشف أي مخالفات أسرع.. لأن كل عملية رقمية بتتسجل، وده بيخلي تتبع المعاملات أسهل.. وده معناه مكافحة لغسل الأموال والتلاعب المالي بشكل أكفأ.
وتعالى نقولك تطبيقات زي إنستا باي وهوية بيكملوا بعض إزاي؟
إنستا باي هو تطبيق التحويلات الفورية بين البنوك.. من خلاله تقدر تحول فلوس لأي حد في ثواني من غير ما تروح البنك.
أما هوية، فهي الهوية الرقمية اللي بتربط كل بياناتك الرسمية في مكان واحد: الرقم القومي، الصورة، البصمة، رقم الموبايل، وحتى بعض بياناتك البنكية.
يعني لما تستخدم إنستا باي وهوية سوا، كل عملية بتحصل بشكل مؤمن ومربوط بهويتك الحقيقية من غير تزوير ولا ورق.
البنك المركزي شايف إن دي مش مجرد تطبيقات دي بداية لبنية تحتية رقمية متكاملة… المستقبل هيكون فيه أنظمة دفع فوري، بطاقات رقمية، محافظ إلكترونية، وربط كامل بين الجهات الحكومية والبنوك.. بمعنى تقدر تفتح حساب، تدفع فاتورة، أو تقدم على خدمة حكومية من الموبايل في دقايق.
التعليقات