20 شركة بتضخ فلوس بملايين الدولارات في قناة السويس الاقتصادية، بس يا ترى المنطقة دي هتبقى فعلا دبي الجديدة في الشرق الأوسط؟، وهل مصر فعلا قادرة تضاعف استثماراتها وتكسب ثقة أكبر من 20 دولة كمان؟، وإزاي الخطط دي ممكن تغيّر شكل الصناعة في مصر وتخلق فرص شغل بالملايين؟
قناة السويس مش بس ممر مائي عالمي، دي بقت دلوقتي واحدة من أهم المناطق الاستثمارية في الشرق الأوسط كله، وبتجذب مليارات الدولارات من كل حتة في العالم، المنطقة الاقتصادية لقناة السويس قدرت في آخر 38 شهر إنها تجيب استثمارات ضخمة بتوصل لـ10.2 مليار دولار، من خلال أكتر من 311 مشروع صناعي ولوجستي وخدمي، يعني شغل على أعلى مستوى فعلاً.
والأحسن من كده إن الاستثمارات دي جاية من أكتر من 20 دولة مختلفة، من آسيا لأوروبا لإفريقيا، يعني ثقة عالمية في قدرة مصر إنها تبقى مركز إقليمي للتصنيع والتجارة، خصوصًا أن المنطقة بقت نموذج للتعاون الدولي والتنمية المستدامة.
طيب إيه القطاعات اللي واخدة النصيب الأكبر في المنطقة دي؟، هتلاقي صناعات الأدوية والسيارات ومكوناتها والسكك الحديدية والمنسوجات والطاقة الجديدة والمتجددة والصناعات الغذائية والكيماوية، يعني ببساطة كل الصناعات اللي ليها طلب ضخم سواء محلي أو إقليمي، ودي رؤية ذكية جدًا من الدولة علشان تضمن نمو مستمر وفرص شغل ضخمة.
المنطقة الاقتصادية دلوقتي بتتحرك بخطة واضحة جدًا، بدأوا الأول بتجهيز البنية التحتية والمواني ومناطق الصناعية، ده غير الطرق والخدمات اللوجستية، وبعد كده ركزوا على تسهيل المناخ الاستثماري علشان أي مستثمر يدخل يلاقي كل حاجة جاهزة وسهلة.
ودلوقتي بدأوا يدخلوا في مرحلة التوطين، يعني التصنيع جوه مصر مش بس التجميع، علشان القيمة المضافة تفضل جوه البلد.
الخطة الجاية كمان طموحة جدًا، مصر ناوية تضاعف حجم الاستثمارات دي في السنين الجاية، عن طريق التوسع في صناعات تكنولوجية حديثة زي أشباه الموصلات والتكنولوجيا الرقمية والمكونات الإلكترونية، وكمان هيتم تقديم حوافز ضخمة للمستثمرين زي الإعفاءات الضريبية والجمركية ونظام “الشباك الواحد” اللي بيسهل أي إجراءات حكومية، بالإضافة لتدريب عمالة فنية على أعلى مستوى.
المنطقة دي فيها كمان 6 مواني بحرية و4 مناطق صناعية جاهزين يشتغلوا بكامل طاقتهم، يعني لما مشروع جديد يبدأ، كل حاجة حواليه جاهزة، زي النقل والتخزين والخدمات واللوجستيات، وفي خطوة ذكية جدًا، مصر بدأت تفاوض شركات من الصين والهند وتركيا والدول الأوروبية علشان تضخ استثمارات جديدة، خصوصًا في مجالات المستقبل زي الهيدروجين الأخضر والطاقة النظيفة.
ببساطة كده، اللي بيحصل في قناة السويس الاقتصادية مش مجرد تطوير لميناء أو منطقة صناعية، دي خطة شاملة علشان مصر تبقى مركز إقليمي للتصنيع والتجارة، وتتحول المنطقة دي من مجرد طريق للسفن لمصدر قوة اقتصادية ضخمة بيحرك البلد لقدّام.
التعليقات