هو إيه تطبيق “هوية” اللي أطلقه البنك المركزي رسميا فى الساعات الأخيرة؟ وإيه الخدمات اللى هيقدمها لعملاء البنوك ؟ وايه علاقته بالبنك المركزي .. يعنى هل هيكون خاضع لاشراف مباشر منه ولا لأ؟ وإزاي تطبيق على الموبايل ممكن يبقى بديل عن بطاقتك الشخصية؟ وهل فعلاً هنقدر قريب نثبت نفسنا ونتعامل في البنوك والحكومة من غير ما نطلع بطايق أو ورق؟
البنك المركزي المصري أعلن رسميًا عن إطلاق منصة هوية .. واللي بتعتبر خطوة جديدة ومهمة جدًا في رحلة التحول الرقمي اللي الدولة ماشية فيها بخطة واضحة.
المنصة دي تحت إشراف البنك المركزي بشكل مباشر.. وده معناه إنك بتتكلم عن نظام رقمي آمن، موثوق، ومدعوم من أعلى جهة مالية في البلد.
طب يعني إيه “هوية رقمية”؟
ببساطة… دي بطاقتك الشخصية بس على الموبايل..نسخة إلكترونية آمنة من بياناتك الرسمية تقدر تستخدمها بدل ما تمسك البطاقة البلاستيك أو تمشي بملف ورق في كل مشوا.
الفكرة كلها إن الهوية الرقمية هتخليك تثبت شخصيتك بشكل رسمي وأنت في أي مكان.. سواء بتتعامل مع بنك، أو بتفتح محفظة إلكترونية، أو حتى بتدخل على الخدمات الحكومية زي “مصر الرقمية”، خلاص مش محتاج تطلع ورق أو تروح مشاوير.
يعني بدل ما تمسك البطاقة وتقول “أنا أهو”.. النهارده هتفتح التطبيق تدخل بكود أو ببصمة وشك وتقول “أهو أنا… بس ديجيتال”.. من غير طوابير ولا مشاوير ولا مواصلات.
طب إيه اللي بتشمله الهوية الرقمية؟
بتجمع كل بياناتك في مكان واحد .. زي رقمك القومي .. صورتك.. بصمتك أو بصمة وشك.. رقم موبايلك المرتبط بيك.. وكمان بياناتك البنكية أو الحكومية لو فعّلتها.. بمعنى تاني… دي هويتك الرسمية بس في شكل إلكتروني مؤمن بتشفير عالي جدًا.
حد ممكن يسأل ويقول وإيه فايدتها؟
بص يا سيدي… منصة “هوية” هتخليك تدخل على الخدمات الحكومية من غير طوابير ولا مشاوير..و توقع على مستندات رسمية بتوقيع رقمي معتمد.. تفتح حساب بنكي أو محفظة إلكترونية وإنت قاعد في بيتك.. تثبت شخصيتك لأي جهة سواء بنك، أو شركة اتصالات، أو جهة حكومية.
وقريب جدا… هتقدر تمشي بإثبات شخصيتك من غير ما تحتاج بطاقتك في جيبك.. وطبعا البنك المركزي مأمن النظام بأعلى تقنيات التشفير والمصادقة الحيوية.. يعني محدش يقدر ينتحل شخصيتك أو يستخدم بياناتك لأن الدخول بيتم ببصمتك أو وشّك.
التعليقات