أخبار لايت: “الديكوبون” البرتقال الأغلى في العالم

تخيل كده إنك داخل تشتري برتقالة.. وتتفاجئ إن سعرها ممكن يجيبلك وجبة في مطعم 5 نجوم أو بلوفر من براند فخم أو حتى مشوارين بنزين لعربيتك!
عشان كده في التقرير ده هحكيلكم عن فاكهة شكلها بسيط زي أي برتقالة، بس سعرها يخليك تعيد التفكير مرتين قبل ما تقشرها او حتى تفكر تشتريها!
اسمها الديكوبون (Dekopon) .. وبرغم إنها من عيلة البرتقال، إلا إنها أغلى وأحلى نوع في العالم، وطعمها يخليك تحس إنك بتاكل دهب مش فاكهة!

فاكهة الديكوبون ظهرت لأول مرة في اليابان، واللي دايمًا مشهورة بحبها للكمال والدقة، حتى في الزراعة! الفاكهة دي مش برتقال عادي، لكنها ناتجة عن تهجين بين أنواع مختلفة من البرتقال واليوسفي، علشان يوصلوا لطعم مثالي يجمع بين الحلاوة الشديدة وسهولة التقشير.

الديكوبون بيتزرع في مناطق محدودة جدًا زي اليابان وكوريا وبعض مناطق الصين، وده سبب رئيسي في ندرته، لأن الإنتاج محدود، والطلب عليه كبير، خصوصًا في الأسواق الفاخرة اللي بتبيع الفواكه الممتازة للناس اللي بتدور على الجودة مش السعر.

المميز في البرتقال ده إنه خالي تمامًا من البذور، وده بيخليه سهل الأكل ومحبوب من كل الأعمار، وكمان قشره ناعم وسهل التقشير جدًا، غير كده، طعمه بيتوصف إنه أكثر أنواع البرتقال حلاوة في العالم، بدرجة سكر عالية ومذاق ناعم ومتوازن، وده اللي خلاه ياخد مكانه وسط أفخم الفواكه العالمية.

أما بقى الأسعار فهي مش عادية..
الثمرة الواحدة ممكن توصل من 8 لـ20 دولار، وفي اليابان ممكن العلبة الصغيرة اللي فيها كام ثمرة بس مغلفة بعناية توصل لأكتر من 100 دولار!

والسبب ان كل ثمرة بتمر بكذا مرحلة، من فحص دقيقة جدًا قبل ما تتباع، و بيتم فرزها حسب الحجم واللون ونسبة السكر، ولو فيها أقل عيب بتترفض فورًا.

أما من ناحية الزراعة، فالموضوع مش سهل خالص برضو.. المزارعين لازم يزرعوها في تربة خفيفة وجيدة التصريف، وفي مكان بيشوف الشمس كويس وبعيد عن الرياح القوية.

كمان لازم يكون في مسافة بين كل شجرة والتانية حوالي 3 لـ4 أمتار علشان تقدر تكبر وتدي ثمار كويسة.

الري بيكون منتظم جدًا لكن من غير إفراط، عشان مايحصلش تعفن للجذور، والتسميد لازم يكون متوازن علشان الثمار تطلع بالحجم والطعم المطلوبين.
وبيتم تقليم الأشجار دوريًا وتحميتها من أي آفات أو أمراض علشان المحصول يفضل ممتاز.

يعني في النهاية، فاكهة الديكوبون مش مجرد برتقال .. دي تحفة زراعية بتجمع بين الندرة والطعم والجمال، وعشان كده بتتباع بأسعار فلكية.

يعني باختصار، ديكوبون مش برتقال للناس العادية، ده برتقال للناس اللي بتدور على الكمال في كل حاجة!