يا ترى ايه حكاية مشروع اسمه “الصودا آش”؟ وليه الرئيس السيسي بنفسه قال إنه من المشروعات الاستراتيجية ذات الأهمية الكبرى لمصر؟و إيه اللي يخلي مشروع كيميائي ياخد كل الضجة دي؟ وهل فعلاً المشروع ده هيخلي مصر تستغنى عن الاستيراد وتتحول لدولة مصدّرة لمادة صناعية مهمة للعالم كله؟
وليه الصين داخلة شريك أساسي فيه؟ هل إحنا قدام صفقة اقتصادية من العيار التقيل ممكن تغيّر شكل الصناعة في مصر؟ ولا مجرد مشروع جديد على الورق زي غيره؟
الرئيس عبد الفتاح السيسي في لقاء مهم مع رئيس مجلس إدارة الشركة الصينية الوطنية للهندسة الكيميائية أكّد إن مشروع كربونات الصوديوم (الصودا آش) من المشروعات الاستراتيجية ذات الأهمية الكبرى لمصر.. وقال إن المشروع هيُسهم في دعم الاكتفاء الذاتي للصناعات المحلية وتقليل الواردات.. يعني باختصار ما هوش مشروع عادي لكن مشروع ممكن يكون ليه دور محوري في مستقبل الصناعة المصرية.
طيب، إيه بالضبط مشروع الصودا آش ده؟
الصودا آش هي كربونات الصوديوم — مادة كيميائية مهمة جدًا تدخل في صناعات الزجاج، المنظفات، الورق، وحتى الصناعات الدوائية والكيميائية.. المشروع اللي مصر بتخططه هو إقامة مجمع لإنتاج الصودا آش ومشتقاتها بمنطقة العلمين الجديدة بطاقة تصميمية حوالي 600 ألف طن سنويا.
الميزة إن المشروع مش للاستهلاك المحلي بس، الهدف إنه لو فيه فائض يُصدّر، وكمان يقلل فاتورة الاستيراد الكبيرة اللي كانت مصر بتتحمّلها من الصودا آش.
وليه المشروع ده مهم لدرجة إنه يُصنّف استراتيجية كبرى؟
أولا لأن المواد الخام اللي يحتاجها مشروع الصودا آش — زي الملح والحجر الجيري — موجودة في مصر، مما يقلل تكلفة الاستيراد.. وثانيا لأن الصناعات اللي بتستخدم الصودا آش — الزجاج، المنظفات، الورق — مهمة جدًا للاقتصاد، وأي زيادة في إنتاجها يعني قيمة مضافة أكبر للصناعات المرتبطة.. وتالت حاجة لتأمين الصناعة من أي تقلبات في الأسواق العالمية والأسعار، وعدم الاعتماد بشكل كبير على الاستيراد كمان المشروع هيوفر فرص عمل مباشرة وغير مباشرة ويساهم في تنمية المدن اللي هيبقى فيها المشروع.
طيب، وإيه دور الصين في المشروع؟
الصين مشاركة قوية في المشروع ده، خصوصًا من خلال الشركة الصينية الوطنية للهندسة الكيميائية، اللي لها خبرة كبيرة في مشاريع البتروكيماويات والكيمياء العالمية.
الشركة الصينية ممكن تساهم في الرأسمال، أو تقدم تمويلًا يغطي نسبة كبيرة من عقد الهندسة والإنشاء .. وفي اللقاء بين السيسي ورئيس الشركة ، تم التأكيد على تذليل كل العقبات لإنجاح المشروع بالشراكة بين مصر والصين.
الصينيين عندهم خبرة كبيرة في المشاريع الضخمة، وتكنولوجيا صناعية قوية، ومساهمتهم ممكن تسرّع تنفيذ المشروع وتطويره بشكل احترافي.
مش بس كده، الحكومة وقّعت اتفاق مبادئ تمويل بمبلغ حوالي 490 مليون دولار لدعم المشروع.. والاتفاق ده تم بين الشركة المصرية للصودا آش وتحالف من البنوك المحلية والإقليمية، زي البنك الأهلي، والبنوك الأخرى المشاركة.
والوزارة قالت إن المشروع يدخل ضمن استراتيجية الدولة لتعظيم القيمة المضافة للاقتصاد الوطني، وتخفيف العبء على الاستيراد، وخدمة التنميّة المستدامة للمناطق الجديدة.
لكن، زي أي مشروع كبير، فيه تحديات. التنفيذ والمراقبة والالتزام بالمواعيد والتكاليف. وضمان إن التكنولوجيا تكون فعالة وتُدار بكفاءة.
وعشان كده، العلاقة مع الصين والمستثمرين الدوليين مهمة جدًا — لأنهم يجيبوا ليس بس الأموال، لكن الخبرة، التكنولوجيا، والمعايير العالمية اللي ممكن ترفع جودة المشروع.
التعليقات