مصر بتستثمر 15 مليار جنيه في 27 محطة كهرباء بأرض الفيروز، بس يا ترى دي هتخلي سيناء منوّرة 24 ساعة من غير انقطاع؟، وهل الـ27 محطة محولات الجديدة كفاية لتغطية كل مشروعات التنمية هناك؟، وإيه أول المناطق اللي هتحس بالفرق فعلاً بعد تشغيل المحطات دي؟، ويا ترى الكهرباء الذكية دي هتقلل الأعطال فعلا ولا مجرد تطوير شكلي؟.
في وقت الناس كلها بتتكلم عن التنمية والمشروعات القومية، مصر قررت تكمل المشوار وتضرب مثال جديد على الاستثمار الحقيقي في المستقبل، المرة دي في سيناء، اللي بقت ساحة لتنمية ما بتقفش.
وزارة الكهرباء والطاقة المتجددة أعلنت عن استثمارات ضخمة وصلت لـ15 مليار جنيه مخصوص لتقوية شبكة الكهرباء في شمال وجنوب سيناء، وكمان إنشاء 27 محطة محولات جديدة علشان تغطي كل الأنشطة هناك، من زراعة وصناعة وعمران.
الوزير محمود عصمت بنفسه راجع خطة التطوير والتوسعات، وقال إن الهدف إن الكهرباء توصل لكل بيت ومصنع ومشروع هناك من غير انقطاع ولا ضعف.
واللي اتنفذ فعلًا مش بسيط، 27 محطة خلاص دخلوا الخدمة، و4 محطات كمان شغالين عليهم دلوقتي، غير أكتر من 3500 كيلو متر خطوط كهرباء على الجهد العالي والفائق، كل ده علشان سيناء تفضل منوّرة ومتصلة بباقي الجمهورية.
الوزير كمان أكد إن الشغل مش مجرد توصيل طاقة وبس، ده تطوير شامل بالشبكة عشان تبقى “شبكة ذكية” حديثة، قادرة تستوعب كميات ضخمة من الكهرباء خصوصًا من الطاقة المتجددة اللي مصر بقت بتركز عليها في السنين الأخيرة.
الموضوع كمان مرتبط بمشروعات التنمية الزراعية الكبرى اللي الدولة شغالة فيها في سيناء، زي مشروعات جهاز مستقبل مصر للتنمية المستدامة اللي بيحتاج طاقة ضخمة لتشغيل الصوب الزراعية ومعدات الاستصلاح والتصنيع.. وده غير المشروعات القومية التانية، زي الطرق الجديدة، والمناطق الصناعية، والمنشآت الحيوية، اللي كلها محتاجة كهرباء مستقرة ومتواصلة.
كمان أن من أهم أولويات الدولة دلوقتي هو تأمين الطاقة وجذب الاستثمار، لأن المستثمر مش هييجي إلا لما يلاقي بنية تحتية قوية وكهرباء مضمونة، وده اللي مصر فعلاً بتشتغل عليه دلوقتي.
الوزير ختم كلامه برسالة مهمة جدًا، وقال إن الدولة ماشية في خطة طويلة المدى علشان تحوّل شبكة الكهرباء من الشكل التقليدي القديم لشبكة ذكية متكاملة، بتشتغل بأعلى كفاءة وأقل فاقد، وبتخدم التنمية الشاملة في كل حتة من أرض مصر.
يعني ببساطة، سيناء مش بس أرض المعارك والانتصارات، دي دلوقتي أرض التنمية والطاقة والمستقبل، ومصر بتقول للعالم كله، إحنا ماشيين لقدام ومفيش رجوع!
التعليقات