هو إيه اللي بيحصل في سوق الدهب؟ الأسعار دي طلوع من غير فرامل ولا ممكن يحصل تصحيح قريب؟ ولو إنت ناوي تشتري.. تشتري دلوقتي ولا تستنى يمكن الأسعار تهدى شوية؟.. الأسئلة دي بقت شاغلة كل بيت وكل مستثمر صغير وكبير في مصر.
الأيام اللي فاتت سوق الدهب محليًا وعالميًا شغال على سخونة غير عادية الدهب عالميًا لسه محافظ على مستويات قريبة من أعلى قمة تاريخية بسبب عوامل كتير زي التوترات الجيوسياسية ,قرارات البنوك المركزية حوالين العالم خصوصًا الفيدرالي الأمريكي وكمان حركة الدولار قدام باقي العملات.. وطبعًا أي حد بيتابع عارف إن الدهب مش مجرد معدن.. ده أداة أمان، ملاذ آمن وقت الأزمات، وكل ما الدنيا تبقى مضطربة الناس تجري عليه.
في مصر الصورة ليها طابع تاني. سعر الجرام مش بيتأثر بالسوق العالمي بس.. لأ كمان بيتأثر بسعر الدولار في السوق المحلي وبقرارات البنك المركزي حوالين الفايدة.. يعني ممكن تلاقي سعر الأونصة عالميًا ثابت.. لكن الجرام في مصر طالع أو نازل بسبب حركة الدولار.
طب إيه اللي حاصل حاليًا؟
سعر جرام الذهب عيار 21 في السوق المصري بيتحرك في نطاق عالى تخطى ال 5 الاف جنيه لأول مرة فى التاريخ ولسه عند مستويات تاريخية مقارنة بالسنة اللي فاتت.. وفيه توقعات إن الأسعار ممكن تفضل متماسكة الفترة الجاية، خصوصًا مع إن البنك المركزي المصري داخل على اجتماع مهم جدًا، والناس كلها مستنية هل هيكمل في سياسة خفض الفايدة ولا ممكن يوقف عشان يوازن السوق. أي قرار هيأثر بشكل مباشر على حركة الجنيه قدام الدولار، واللي بدوره هيأثر فورًا على سعر الدهب.
وهنا ييجي السؤال اللي كل الناس بتسأله.. أشتري دلوقتي ولا أستنى؟
بص يا سيدي.. لو بتشتري دهب للادخار طويل المدى غالبًا أي وقت هو وقت مناسب لأن الدهب دايمًا بيحافظ على قيمته على المدى البعيد.. لكن لو بتفكر في المضاربة أو عاوز تستنى لحظة التصحيح لازم تركز مع المؤشرات العالمية خصوصًا بيانات التضخم الأمريكي وقرارات الفيدرالي ومعاها قرار البنك المركزي المصري.. لو حصلت انفراجة في الدولار ونزل سعره محليًا ده ممكن يضغط على أسعار الدهب شوية ويديك فرصة تشتري بسعر أقل.
إنما لو الدولار فضل ثابت أو طالع يبقى أي تراجع في السعر مش هيكون كبير ولا مستمر.. وده اللي يخلي كتير من خبراء السوق يقولوا: لو محتاج تشتري ما تضيعش وقت، لكن لو عاوز تستثمر بمبالغ كبيرة، استنى اجتماع البنك المركزي وشوف الاتجاه.
المهم كمان نعرف إن سوق الدهب المصري حساس جدًا لأي إشاعة أو خبر.. يعني مجرد كلام عن استيراد كميات جديدة أو قرارات تخص الجمارك أو الضرايب، بيأثر فورًا على السعر. فالمتابعة اللحظية بقت ضرورية.
الدهب في مصر ماشي في اتجاه صاعد مدعوم بالدولار والتوترات العالمية، ومش متوقع ينزل نزلة قوية إلا لو حصل هبوط مفاجئ في الدولار أو انفراجة كبيرة في الاقتصاد العالمي. لو ناوي تحوّش أو تحفظ قيمة فلوسك.. ادخل دلوقتي. ولو ناوي تستنى تصحيح بسيط عشان تقتنص سعر أقل، يبقى ركّز قوي على القرارات الاقتصادية الجاية لأنها هي اللي هتقول الكلمة الفصل.
التعليقات