لو كنت من الناس اللي بتحب تسترخي على الكرسي بعد الأكل وتفتح زرار البنطلون، خليني أقولك إنك بتفوّت على جسمك كنز من الفوائد الصحية.
الموضوع مش محتاج جيم ولا مشي ساعة.. إحنا بنتكلم عن دقيقتين بس من المشي الخفيف بعد الوجبة، والنتيجة؟ فرق كبير مش هتتوقعه.
- بتضبط السكر في الدم
بعد الأكل، مستوى السكر بيبدأ يعلى، وده خطر خصوصًا لمرضى السكري أو الناس المعرضة له.
لكن لما تمشي حتى دقيقتين، جسمك بيبدأ يستخدم السكر في العضلات، بدل ما يتراكم في الدم.
يعني بتقلل خطر ارتفاع السكر وتحافظ على نشاطك.
- بتهضم أسرع وأريح
المعدة بتشتغل أحسن لما الجسم بيتحرك.
المشي بعد الأكل بيحسن حركة الجهاز الهضمي، ويقلل الانتفاخ، والحرقة، والإمساك.
يعني تودع تقلبات البطن اللي بتضايقك بعد الوجبات.
- بتقلل فرص تخزين الدهون
كلنا عارفين إن الجسم بيخزن الزيادة من الأكل دهون.
بس الحركة البسيطة بعد الأكل بتخلي جسمك يحرق جزء من السعرات على طول، وده يقلل فرص التخزين ويزود الحرق.
- بتحس بنشاط مش نعاس
كتير من الناس بتحس بالخمول بعد الأكل، وده طبيعي لما الدم يروح للهضم.
لكن المشي السهل بيرجعلك النشاط، ويخلي دماغك صاحي وجاهز تكمل اليوم.
طب نتمشى إزاي؟
مش محتاج تجري، امشي براحتك في البيت، أو حتى في مكانك.
اختار وقت بعد الأكل بـ 5 لـ10 دقايق.
دقيقتين كفاية كبداية، وبعد كده ممكن تزودهم لو حبيت.
الخلاصة؟
صحتك مش محتاجة مجهود خارق، بس محتاجة وعي.
قوم بعد أكلك، وتمشى شوية.. وافتكر: دقيقتين دلوقتي أحسن من أدوية بكرة.
التعليقات